ముగ్గంటే

పండుగ అయిపోయినా జ్ఞాపకాలు గుండెల నిండా ఉంటాయి. నేటి నిజం పత్రికలో నా కవిత “ముగ్గంటే”. బైసా దేవదాసు గారికి ధన్యవాదాలు. 17-2-2024 మా పెళ్ళి రోజు సందర్భంగా ఆశీస్సులు అందించిన మిత్రులందరికీ ప్రేమాత్మకమైన ధన్యవాదాలు

వాకిట్లో నాలుగు చుక్కలు పెట్టి

రంగులేయడం కాదు ముగ్గంటే

నలుగురు మనుషులను కూడగట్టడం

వాకిళ్లు చిమ్మి కళ్ళాపి చల్లే పనిమనుషుల సందడి

పేడకళ్ళకోసం వీధుల్లో పోటీపడి తిరిగే అమ్మలక్కలు

రాతి ముగ్గుపిండి రతనాల పిండి మల్లెపువ్వంటి పిండి

సమయానికి తగుమాటలల్లి

ముగ్గుపిండి అమ్మే వీరయ్య తాత కేకల ప్రతిధ్వని వీధంతా

ఇంద్రధనుస్సు రంగులను నేలమీదికి దింపి

పొట్లాలు కట్టి రంగులమ్మే రమణమ్మ సృజన

ముగ్గులోన పెట్టే గొబ్బెమ్మ కోసం

పచ్చపచ్చని తంగేడు పూలను గంపకెత్తుకుని

పొద్దుపొద్దునే ఇల్లిల్లు తిరిగే ఈశ్వరమ్మ

ముగ్గు వేసి వేయగానే వాకిట్లోకి వచ్చి

పశువు ఆశీసులు శిశువులకు మంచిదని

గంగిరెద్దులాడించే దంపతుల జంట

పళ్లెంలో గొబ్బెమ్మను పెట్టుకుని

‘గొబ్బియల్లో గౌరమ్మ సల్లంగ చూడే

గొబ్బియల్లో గౌరమ్మ మంచి వానలు పడనీయవే

గొబ్బియల్లో గౌరమ్మ సంపదలనీయవే ‘

గొబ్బి పాటలు పాడుతూ ముంగిళ్ళను

ముత్యాల పందిరిని చేసే ముదితల పాట కచ్చేరీలు

హరిదాసుల కీర్తనలు బుడబుక్కలవాని డబుడక్క ఢమరుక నాదాలు

పండుగ దానాలు చేయమని గడపగడప తిరిగి

జోలెల్లో బియ్యం, అరిసెలు, మణుగుపూలు నింపుకుని

గుండె నిండిన ఆనందంతో పరవశించే అల్పసంతోషులు

ముగ్గు వేయడమంటే జన జాతర

పండుగ అంటేనే పలువురినీ కలిపే వేడుక

ఇచ్చిపుచ్చుకునే వాయనం

సాయమందించే సంప్రదాయం

సరదాలు, సంతోషాలను కలగలిపి

అల్లుకునే అనుబంధాల పూలమాల

పండుగ అంటేపదిమంది కలిసిమెలిసి

పాడుకునే తియ్యనైన పాట

రోహిణి వంజారి

9000594630

19-1-2024.