ఆయుధం

క్రింది కవిత “ఆయుధం” మాలిక అంతర్జాల పత్రికలో ప్రచురింపబడింది. చదివి మీ అభిప్రాయాలు తెలియజేయు ప్రార్ధన.

—————————————————————————————————————————

“ఎక్కడమ్మా నీకు రక్ష
ఓ దిశా, నిర్బయా,అభయా, ఆయోషా,ఆసిఫా…
నువ్వేవరైతే ఏమి ఈ భువిలో
అమ్మ గర్భంలో నువ్వు
రూపుదిద్దుకోక ముందే
ఆడపిల్లవని గర్భంలోనే
నిన్ను చిదిమేసే కసాయి
తల్లిదండ్రులున్నారు ఈ లోకంలో
జాగ్రత్త తల్లి జాగ్రత్త…
నువ్వు పుట్టాక ఎదిగీ
ఎదగని నీ చిరుదేహాన్ని
మందంతో కాటేసే కామాంధులు
ఉన్నారు ఈ లోకంలో
జాగ్రత్త తల్లీ జాగ్రత్త…
కులాంధత్వం,మతమౌఢ్యం,
కక్షలు, కార్పణ్యాలు,
అన్నీంటీకీ ప్రతీకారం తీర్చుకోవడానికి నీ దేహాన్నే
వేదిక చేసుకునే మానవ
మృగాలున్నాయి ఈ లోకంలో
జాగ్రత్త తల్లీ జాగ్రత్త…
అమ్మ ఒడిలో,చదువుల బడిలో, ఆఖరికి
దేవుడి గుడిలో కూడా
నీకు లేదమ్మా రక్ష….
దుష్టశిక్షణ, శిష్టరక్షణ
కావించాల్సిన దేవుని ముందే
నీపై జరిగే మృగ దాడులకు
చలించని ఆ దేవుడు
రాతిబొమ్మే అని తేలిపోయాక
ఇంకెక్కడ తల్లీ నీకు రక్షణ…
ఇకపై తల్లి పేగునించీ నీ

బొడ్డు తాడుకు చేరాల్సింది
ఆహారం కాదు, అంతకంటే
ముందే చేరాలి నీలో
ఆత్మవిశ్వాసం, అన్యాయాన్ని
ఎదుర్కునే శౌర్యం…
ఆదినుండి పోరాటమే
కావాలి నీ ఆయుధం.”