అనాహత

ఈనాటి సాక్షి పత్రిక ఆదివారం అనుబంధం ఫండే లో నా కవిత “అనాహత” చదవండి. మీ అమూల్యమైన అభిప్రాయాలు తెలుపండి.

పిట్టల పాటలు – సెలయేటి గలగలలు
తుమ్మెదల ఝంకారం చిరుగాలి సవ్వడి
ఉహు..ఏ శబ్దం వినిపించడంలేదు
ఎవరినీ ఏ అలికిడి కదిలించడం లేదు
కళ్ళముందు కదిలేవి లోపల తాకడంలేదు..
మనసు మూలల్లో
ఎప్పటెప్పటివో నిశ్శబ్దపు శబ్దాలు
తెరలుతెరలుగా పొరలుపొరలుగా
అతుక్కుంటూ ఊడిపోతూ
గెలుస్తూ ఓడిపోతూ..
తడి కళ్ళతో నవ్వినట్లో
చెమ్మగిల్లిన గుండెను తడిమినట్లో
ప్రేమో ద్వేషమో తెలిసేదెట్టా..?
ఎన్నేళ్ళనుంచో చప్పుడు చేయని శబ్దాలు
నిశ్శబ్దంగా చుట్టూ చేరి అనుక్షణం
ధ్వనితరంగాలై దేహం నిండా ప్రవహిస్తుంటే
ఇంద్రియాలను స్పర్శించేవి
మనో వేదికను చేరడంలేదు
హృదయం ఇప్పుడు అంతర్గతంగా
బహిర్ముఖమైన అనాహత..

రోహిణి వంజారి
9000594630